भगवंताची नड वाटू दे, प्रपंचात या घडोघडी हीच प्रार्थना रामपदी!

भगवंताची नड वाटू दे, प्रपंचात या घडोघडी 
हीच प्रार्थना रामपदी!ध्रु.

राम माय मी तिचे लेकरू 
राम गाय मी सान वासरू 
ऐसी तळमळ अंत:करणी, वाट पाहतो येत कधी?१ 

श्वासासम मज राम हवासा 
त्या रामाचा खरा भरवसा 
दुसरे काही नलगे मजला अशी भावना होत कधी?२ 

ईशप्रीती येइल शोधत 
नामाची घेउनिया सोबत -
आस एकली, मनात जपली भाविक भक्ताने साधी!३ 

रचयिता : श्रीराम बाळकृष्ण आठवले

गोंदवलेकर महाराज यांची प्रवचने मधील प्रवचन क्रमांक ८३ (२३ मार्च) वर आधारित काव्य.

प्रपंचात भगवंताची नड आहे असे वाटले पाहिजे.
भगवंताची कृपा आपल्यावर असावी. नामाचे प्रेम आपल्याला यावे असे वाटते पण हा अनुभव आपल्याला का बरे येत नाही. भगवंत नसेल तर माझे चालणार नाही, माझ्या समाधानाला त्याची अत्यंत गरज आहे असे आपल्याला मनापासून वाटतच नाही. प्रपंचाची स्थिती कशीही असो मला भगवंत हवाच असे आम्हास तळमळीने मनापासून वाटत नाही. प्रपंचात आम्हाला सुख मिळेल ही आमची कल्पनाच नाहीशी व्हावयास पाहिजे. प्रपंच आम्हास शाश्वत समाधान देऊ शकत नाही हे एकदा निश्चयाने ठरले, म्हणजे मग भगवंताची गरज आम्हाला भासू लागेल व मग त्याच्या प्राप्तीसाठी आम्ही केलेल्या प्रयत्नाचे आड जग, परिस्थिती वगैरे काही येऊ शकणार नाही. भगवंत मला पाहिजेच हे विचाराने ठरवल्यानंतर, त्याचे प्रेम आम्हास यावे असे आपल्याला वाटू लागेल.