दीपक असता करी पंथ हा आपण उलगडतो!

रुळल्या मार्गावरी चालता अपाय ना होतो
दीपक असता करी पंथ हा आपण उलगडतो!ध्रु.
 
स्वधर्मकर्मी मन घालावे 
ईश्वरपूजन ते मानावे 
कर्मफुलांची माला मिळता परमात्मा तोषतो!१

वर्णविहित जे कर्म लाभले 
तेच पाहिजे कार्य मानले 
जे सोपविले ते करताना साधक ना अडतो!२ 

क्षात्रकर्मि तर निपुणच अर्जुन
स्वजनासक्ती ठरली बंधन 
मोहन त्याचे बंधन प्रेमे सहजपणे तोडतो!३

सत्कर्माला तीर्थ योग्यता 
अंतरंगही वरिते शुचिता 
भक्तीच्या उदयाने भगवन् अंतरात हसतो!४

रचयिता : श्रीराम बाळकृष्ण आठवले
०४.०१.१९७४

स्वामी माधवनाथांच्या ज्ञानेश्वरी ज्ञानकिरणे या पुस्तकातील प्रवचन क्र. १२ वर आणि खालील ओव्यांवर आधारित काव्य
 
जैसे मार्गचि चालता । अपावो न पवे सर्वथा
कां दीपाधारें वर्ततां । नाडळिजे ।।२ : १८७ 
तयापरी पार्था । स्वध‌र्मे राहाटतां । 
सकळकामपूर्णता । सहजें होय ॥२:१८८