सप्त भगीरथ एक जाहले, हसली पुण्याई
गंगा आली! गंगा आली!ध्रु.
गंगा आली! गंगा आली!ध्रु.
पुन्हा एकदा इतिहासांतरि असे गाजले पुणे
नवीन शिक्षण नवसंजीवन इथे न काही उणे
आत्मप्रत्यय जागा झाला या सांप्रत काली!१
शासकीय ती नको नोकरी नकोच लाचारी
स्वातंत्र्याचे कमळ उमलु दे इथल्या कासारी
रविकिरणांचा झोत यावया प्रभात ही झाली!२
सुपीक भूमी येथे रुजले बीज शिक्षणाचे
घनछायेचा वृक्ष व्हायचा स्वप्न मनी नाचे
तोफ डागली रणमर्दांनी रणनौबत झडली!३
कर्म करावे विहित आपुले आस फलाची नसे
व्यक्ती व्यक्ती समरसलेली समष्टि हासतसे
उरी चेतली ध्येयज्योती घनतिमिरा उजळी!४
रचयिता : श्रीराम बाळकृष्ण आठवले
न्यू इंग्लिश स्कूलच्या स्थापनेच्या प्रसंगावर आधारित काव्य.
No comments:
Post a Comment