भगवंतास पहाण्यास स्वांतर शुद्ध करावे

पहाण्यास देवा, नराने स्वांतर शुद्ध करावे!ध्रु.

विषयि गुंततो 
रामा मुकतो
विलास वमन गमावे!१

निर्मळ अंतर
असो निरंतर
रामनाम नित गावे!२

नाम स्मरता 
गळे अहंता 
गुरुबोधा ठसवावे!३

रचयिता : श्रीराम बाळकृष्ण आठवले 

गोंदवलेकर महाराज यांची प्रवचने मधील प्रवचन क्रमांक ३३३ (२८ नोव्हेंबर) वर आधारित काव्य.

भगवंतास पाहण्यास स्वांतर शुद्ध करावे. वासनेमुळे जन्माच्या फेऱ्यात आपण सापडलो. विषयातच आम्ही गुंतून राहतो ते सोडावे. जोपर्यंत आपले अंत:करण शुद्ध नाही, तोपर्यंत आपल्याला सर्वत्र भगवंत दिसणार नाही. भगवंत सर्व ठिकाणी पाहताना तो आपल्यातही आहे हे पाहिले पाहिजे. संतांचा थोडासा कटाक्ष जो कर्ममार्गावर आहे तो याचकरिता की कर्म करण्याने अभिमान येतो आणि त्या उलट गुरुआज्ञेत वागल्याने तोच अभिमान नाहीसा होतो. ज्याप्रमाणे गुरु आपल्याला नामस्मरण करायला सांगतात ते पूर्वीचा विषयाचा अनुभव नष्ट करण्यास्तव. जो आपली विषयवासना कमी करून आपल्यामध्ये नामाचे प्रेम उत्पन्न करील तोच खरा सद्गुरु होय.