ठेव ध्यानीं तू मना..

' राम कर्ता ' भावना ही ठेव ध्यानीं तू मना!ध्रु.

नाम घेई आदरे-
थांबलासी का बरें?
राम असता साह्यदाता काय करिते वासना?१

जन्ममृत्यू चुकवि फेरा
आठवीं रामा उदारा-
भक्तिपंथे चालता तुज धैर्य देते प्रार्थना!२

दाखवी तव तळमळ
राम आहे प्रेमळ
चालत्यासी शक्ति मिळते करित राहा साधना!३

रचयिता : श्रीराम बाळकृष्ण आठवले 

गोंदवलेकर महाराज यांची प्रवचने मधील प्रवचन क्रमांक ३३४ (२९ नोव्हेंबर) वर आधारित काव्य.

वासनेचा गढूळपणा घालविण्यासाठी ' राम कर्ता ' ही भावना दृढ करायला पाहिजे. भगवंताच्या नामाची तुरटी फिरल्याने वासनेचा साका खाली राहून शुद्ध अंत:करण प्रकट होईल. सत्तावान, श्रीमंत, वैभववान माणसे सुखी असतात हा नुसता भ्रम आहे. जोपर्यंत यांना भगवंताचा आधार नसतो तोपर्यंत या सर्व गोष्टी कुचकामाच्या आहेत. तुम्ही थोडी तरी गोडी दाखवा, निश्चय दाखवा, तळमळ दाखवा, पुढची जबाबदारी भगवंताकडे आहे. म्हणून पुन्हा सांगावेसे वाटते की वेळेला जागे होऊन योग्य रस्त्याला लागा. भगवंताच्या नामात राहून सर्व काय ते करा.