नाम रामाचे आपण घेऊ! अंतरांत रामा पाहू

नाम रामाचे आपण घेऊ! 
अंतरांत रामा पाहू!ध्रु. 

देवाचे गाता गान 
सुटु देत तनाचे भान 
तो भक्तसखा नित ध्याऊ!१

रामाने दिधले नाम  
स्मरुनिया होउ निष्काम 
भजनात रंगुनी जाऊ!२

जो विस्मरला देहाला 
तो भगवंताचा झाला 
हा अनुभव आपण घेऊ!३

रचयिता : श्रीराम बाळकृष्ण आठवले 

गोंदवलेकर महाराज यांची प्रवचने मधील प्रवचन क्रमांक ३३८ (३ डिसेंबर) वर आधारित काव्य.

जो भगवंताचे नाम घेईल, त्याचे राम कल्याण करील, हे माझे सांगणे खरे माना. नाम हे रामबाणाप्रमाणेच आहे. रामबाण म्हणजे बरोबर काम करणारा बाण. आपल्या लक्ष्यावर अचूक जाणारा बाण होय. तो बाण पुन्हा परत येऊन भात्यामध्ये बसत असे. रामनाम हे रामाच्या जवळ राहणारे आणि अगदी अचूक रामाकडे नेणारे एकमेव साधन आहे. जोपर्यंत जीवाला शुद्धि आहे, तोपर्यंत नाम घेता येते. ज्याचे चित्त पूर्णपणे नामात रंगले तो स्वतःला पूर्णपणे विसरतो, आणि त्यावेळी त्याला भगवंताचे दर्शन घडते.