जय देवी जय देवी जय भगवद्गीते

जय देवी जय देवी जय भगवद्गीते
श्रवण नि वाचन गायन संजीवन वाटे!ध्रु.

होउनिया अर्जुन जो करि तव अभ्यास
अंत:करणी त्याच्या भरतो उल्हास
कर्तव्यच प्राणाहुन होते आवडते!१

आसक्ती देहाची सगळी घालविली
आदि नच अंत मला जाणिव बाणवली 
विश्वात्मक सर्वात्मक सश्रद्धा करते!२

कर्माचे अति सुंदर साधन तू देशी
न लगे फल माते मन उन्मनही करशी
मातांची माता तू सगळ्यांना पटते!३

चारी वर्ण नि आश्रम करण्या कर्तव्य
मोह न मोहनदासा अनुभव दे दिव्य
ज्ञानाची गंगा गे आतुन झुळझुळते!४

शांतिस्तव न्यायास्तव लागे झुंजाया
पौरुष ते आवर्जुन लागे फुलवाया
अचला अमला मति दे श्रीरामाते!५

रचयिता : श्रीराम बाळकृष्ण आठवले
१०.०३.१९९८