अवधूता दत्ता, दत्ता अवधूता - भावे मी स्मरतो - भूपाळी गातो!

अवधूता दत्ता, दत्ता अवधूता -
भावे मी स्मरतो - भूपाळी गातो!ध्रु.
 
अंतरि मम यावे - दयाळा 
प्रेमे शिकवावे 
गुरुमाऊली, चरणाजवळी, स्थान सान मागतो!१

अजाण बालक मी - सद्गुरो 
चरणी विनम्र मी 
लावी मज हृदयी कृपाळा कृपादान मागतो!२ 

सत्य नि शिव सुंदर, प्रभो हे 
एकत्रित सुंदर 
दर्शन सुख द्यावे त्रिमुर्ते बालहट्ट धरतो!३
 
लाव भस्म भाळी, सद्गुरो 
काम दुष्ट जाळी
भावभक्ति बहरो माउली स्तवन तुझे गातो!४

सोऽहं शिकव मला, कृपाळा 
ध्याना बसव मला 
अचपळ मन माझे आवरी, शरण शरण येतो!५ 

अवघड डोंगर घाट, सद्गुरो
कोण दाखविल वाट? 
बावरतो, थकतो भीक मी ज्ञानाची मागतो!६ 

कमंडलूतिल जल याचितो
भरु दे मम ओंजळ 
तृषार्त श्रीराम जीवना आसुसला होतो!७  

रचयिता : श्रीराम बाळकृष्ण आठवले
८.८.१९७६