स्वर्ग हा भूवर अवतरला...

शीतल गंधित वायु सुटला, दुमदुमला चौघडा
प्राजक्ताने हसत घातला सुमनांचाही सडा
सनई गाई, मंजु स्वराने आलापित कोकिला
स्वर्ग हा भूवर अवतरला!१

दशरथहृदयी सागर उसळे, मुखचंद्रांच्या दर्शनामुळे
गहिवर आला भरले डोळे आनंदाश्रू झर झर झरले
कानी आला बालरुदनस्वर धन्य जन्म झाला
स्वर्ग हा भूवर अवतरला!२

जन आनंदित, संत उल्लसित, वृक्ष प्रफुल्लित झाले
अमृतसम मधु पय शरयुतुन कधिचे झुळझुळले
ध्वज उभारले, सजली द्वारे, उच्च स्वर लागला
स्वर्ग हा भूवर अवतरला!३

थवे स्त्रियांचे पथापथांतुन, पुष्पवृष्टी प्रासादातुन
मुग्ध कळ्या ही आल्या उमलुन, अधिक कोवळे झालेले ऊन
कस्तुरि, चंदन, कुंकुम यांचा सडा पथी घातला
स्वर्ग हा भूवर अवतरला!४

रचयिता : श्रीराम बाळकृष्ण आठवले
१५.७.१९७३
सारंग आधा