शुभं करोति!

देवापुढे लावा दिवा
शुभं करोति हे म्हणा।
घरधनी असो सुखी
सांगा हेच दयाघना।
आईची ही शिकवण
बालमनाला भावली।
मास गेले गेली वर्षे
सुखलिपी उमटली।
देवाजीशी नाते असे
कायमचे जुळलेले।
आहे पाठीशी सदैव
आले अनुभवा आले।
इडा पिडा टळलेली
अमंगल पळाले ते।
प्रभुच्छाया शिरावर
जाणवले जाणवते।
मंगलारती प्रसाद
सुधेहून सारे गोड।
बावरल्या मना रुचे
नाम, ज्याला नाही तोड।

रचयिता: श्रीराम बाळकृष्ण आठवले
४.९.२००४