सद्गुरुंचा शोध..

नकोस हिंडू वणवण ऐसा सद्गुरु शोधाया
तुझ्याच हृदयी वास तयाचा श्रम होतिल वाया!ध्रु.

सद्भावाला जागविण्याला साधन ते नाम
नाम मुखाने सुखे घेत जा करताना काम
सदाचार हा परमार्थाचा सुदृढसा पाया!१

मायतात तर खोड चंदनी सातत्ये झिजले
परतीची ना जरा अपेक्षा झिजता ते हसले
त्यांचे सद्गुण तेच सद्गुरु हवेत ते घ्याया!२

आकाशाला लेप न कसला विशाल ते कैसे
या भूमीला भार न कसला सहणे ते कैसे
क्षमाशीलता, विशालता ती अंगी येऊ द्या!३

सुमने देती फळेहि देती इंधन देतात
उन्हात आपण तरी वृक्ष ते छाया देतात
उपकाराला अंत न त्याच्या शिकून घे किमया!४

अनुभव येता आपण चालत सावध वर्तावे
चुकत शिकावे, सुधरत जावे गाणेहि गावे
ओळख ऐशी पटता पटता सद्गुरु ये ठाया!५

रचयिता : श्रीराम बाळकृष्ण आठवले
२६.९.१९८९