'हर हर महादेव' बोला

'हर हर महादेव' बोला
शिवाच्या चिंतनात डोला!ध्रु.

शंकरा आवाहन करु या
अंतरी त्याला बसवू या
संकटे सुमनांपरि झेला!१

सोसता असंख्य आघात
वज्रता येते देहात
देहही विस्मरणी गेला!२

विरागी राजा योग्यांचा
शंकर नाथ अनाथांचा
स्मशानी स्वर्गही अवतरला!३

जन्म जर पहिला दरवाजा
मरण हा सरता दरवाजा
दरारा मृत्यूचा सरला!४

यायचे सहज निघायाचे
कशातहि ना गुंतायाचे
जिवाचा जीवपणा हरला!५

रचयिता : श्रीराम बाळकृष्ण आठवले
२५.६.२००१