अप्रमाण सगळा नाश करी....

जे प्रमाणात ते सुखकारी
अप्रमाण सगळा नाश करी!ध्रु.

जगण्यासाठी भोजन करणे
जनार्दनास्तव जीवन जगणे
तत्त्व निरंतर ध्यानि धरी!१

व्यर्थ कशाला खा खा करणे
रोगांना आमंत्रण देणे
संयम ठेवा जरा तरी!२

पोटापुरते धन मेळविणे
अधिकाचा हव्यास न धरणे
नीतीचे धन हितकारी!३

लाच न घेणे देह न विकणे
शिव्याशाप ना माथी घेणे
अतिद्रव्य ते घात करी!४

पृथ्वी तत्त्वा समजुन घेणे
कृतज्ञ मातेशीच राहणे-
उठताक्षणि तू नमन करी!५

ती न तुझी रे केवळ मत्ता
काळ ना तरी देई लत्ता
लोभच अंती माती करी!६

रचयिता : श्रीराम बाळकृष्ण आठवले
१०.६.१९९१