जय जय योगेश्वर भगवान् कर्तव्याच्या मार्गावरती कोण सान महान् !

जय जय योगेश्वर भगवान्
कर्तव्याच्या मार्गावरती कोण सान महान् !ध्रु.

असेन अथवा नसेन ही मी, तो परमेश्वर आहे 
कसे वागतो, कसे बोलतो याचा साक्षी आहे 
मानव मंगलतेची मूर्ती शिल्प घडविले छान!१
 
वेदांचा अभ्यास घडावा स्वाध्यायाचा छंद 
मुलेमुली वाढती घरोघर सगळी बालमुकुंद 
ध्येय असावे सुदूर प्राप्तीसाठी गावे गान!२

शरीर सुघटित भेदक दृष्टी वाणीही ओजस्वी 
हात आडवे छाती वरती मुद्रा अति तेजस्वी 
त्रिकाल संध्या गीतागायन म्हणजे अमृतपान!३ 

हात न पसरावा मागाया डबे संगती घ्यावे 
गोपाळाचे नाम घेउनी कामालाच भिडावे 
बंधुत्वाच्या सहकाराच्या भावा ना उपमान!४

रचयिता : श्रीराम बाळकृष्ण आठवले
१०.०५.२००४