मनाचे श्लोक गात जा ..

ऑडिओ - मनाचे श्लोक गात जा

मनाचे श्लोक गात जा 
तुझा तू शिक्षक राजा! ध्रु.

मारुति श्वासाश्वासात 
अनंतचि हा राघवपंथ 
लाडक्या, गगनी जा जा!१ 

असे जो सोडविता देवा 
तोच तो राघव जोडावा 
तनाहुन दूर सरक जा!२ 

गीता असे मनोबोध 
समर्था आत आत शोध 
स्वधर्मा आचरीत जा!३ 

जगाचे काय किती घेणे 
निश्चये ऋण फेडत जाणे
काया कष्टवीत जा!४ 

सुखाच्या अधीन जो होतो 
नित्य तो खोल खोल रुततो 
कमळ तू फुलवत जा जा!५ 

नाम ते सुधारून घेते 
अधीरा सुधीर ते करते 
निष्ठा बळकट कर जा!६ 

राघव जीवनात आहे 
राघव स्थितप्रज्ञ आहे 
मनाने प्रसन्न हो जा!७ 

समर्थे समर्थ मन करणे 
असे हे गुणाधीश होणे 
तुझा तू स्वामी हो जा!८ 

जय जय रघुवीर समर्थ! 

रचयिता : श्रीराम बाळकृष्ण आठवले
२९.०८.२००४