जय जय तुलसीदास

जय जय तुलसीदास, 
करा हो भक्ताचे घरि वास!ध्रु. 

तुलसी, तुलसी मानस गाते 
जय सियाराम कुणि कानी म्हणते 
ये तुलसीचा वास!१ 

श्रीरामाची सुभग आकृती 
उभी राहते नयनांपुढती 
मन भिडले गगनास!२ 

गगन निळे श्रीरामच आहे 
मन पवनाचा पुत्रच आहे 
रामदूत जणु खास!३ 

मानसात मन करि अवगाहन
श्रीरामाचे मिळे निमंत्रण 
भेटे जीव शिवास!४ 

काम मनीचा राम करा हो 
पंकातुन पंकज फुलवा हो 
रामच तुलसीदास!५

रचयिता : श्रीराम बाळकृष्ण आठवले
२६.०७.१९८४