आनंद गगनि मावेना..

आनंद गगनि मावेना, आनंद गगनि मावेना!ध्रु.

ध्यानयोग भगवंत सांगतो
सकल जगाला प्रभु तोषवितो
गंगा आली परमार्थाची स्वये चालुनी सदना!१

सरिता वाहे आत्मानंदे
तिचिया तीरी गोकुळ नांदे
कल्पना न तिज ती उजळविते जीवांच्या जीवना!२

उपकारच जणु हे पार्थाचे
निमित्त घडले अज्ञानाचे
ज्ञान सुमंगल म्हणुनि येतसे सहजच अपुल्या श्रवणा!३

विकल अवस्था सरली सरली
तृषा मनाची शमली शमली
अमृतमधुरा वाणी परिसुनि मानस करिते नर्तना!४

गीतेचे ये सारच हाता
पैलतीर तो दृष्टिस पडता
पुष्प अनंताचे हे अवचित वितरत मंगलदर्शना!५

रचयिता : श्रीराम बाळकृष्ण आठवले
०४.०१.१९७३