अनंत रूपे अनंत नटला

अनंत रूपे अनंत नटला देखिलें त्यासी - 
खूण बाणली कैसी? ध्रु.

चैतन्याचा विलास येथे 
चैतन्याविण काहीच नसते 
जगत् जीव परमात्मा एकच
मिळविलेच ज्ञानासी!१ 

भूषण कधि झाकते सुवर्णा
तेज प्रकटवी अधिकच रत्ना 
रूपे नामे असोत अगणित 
जाणलेच तत्त्वासी!२ 

कशास जगता दूर सारणे? 
सर्व ठिकाणी हरि पाहणे 
गुरुकृपेने स्वरूप - ज्ञाने 
सोऽहं बोध मनासी!३

रचयिता : श्रीराम बाळकृष्ण आठवले
०९.०८.१९७४
केदार, त्रिताल

जालेनी जगे मी झांके
तरी जगत्वे कोण फाके?
किळेवरी माणिके 
लोपिजे काई?
म्हणोनि जग परौते
सारूनि पाहिजे माते
तैसा नोहे उखिते
आघवे मीचि

या ज्ञानेश्वरीतील ओव्यांवर आणि स्वामी माधवनाथ यांच्या ज्ञानेश्वरी ज्ञानकिरणे या पुस्तकातील प्रवचन क्रमांक १३७ वर आधारित काव्य.