हेचि दान द्यावे देवा माझा विसर पडावा!

हेचि दान द्यावे देवा माझा विसर पडावा!
माझा विसर पडावा, तुझा आठव घडावा!ध्रु.

तुझे करता भजन
तुटो देहाचे बंधन
माझा हेतु पुरवावा - देवा केशवा माधवा!१

तुझे धरिले चरण 
आलो तुजसी शरण
जीव तापला पोळला मिळो नामात गारवा!२

तुझी लाभावी संगती
विषयांची घडो तुटी
चित्त शुद्ध करी माझे दीनदयाळ राघवा!३

रचयिता : श्रीराम बाळकृष्ण आठवले
गोंदवलेकर महाराज यांची प्रवचने मधील प्रवचन १४४, २३ मे वर आधारित काव्य.

आपण स्वतःला दिवसातून एकदा तरी विसरतो की नाही? स्वतःला विसरावे पण ते विषयांकरिता विसरू नये, परंतु देवाकरिता जर आपण आपल्याला विसरलो तर ते फारच उत्तम. भजन करताना मी देवापुढे आहे, व तो आणि मी यांचे शिवाय दुसरे कोणी नाही असे म्हणूनच भजन करावे व तशीच सवय ठेवावी म्हणजे देहभाव विसरता येईल. संसारात आपण कोण हे न विसरता संसार करावा म्हणजेच विषयांचे आधीन केव्हाही न होता संसार करावा.