गीतेचा लावत छंद!

गोविंद ! गोविंद ! गोविंद ! 
गीतेचा लावत छंद!ध्रु. 

गीता गाता गोपाळाची 
बेडी तुटते संसाराची 
गीतागायन आनंद!१ 

हृदयी होतो अवतीर्ण 
करतो भक्ता उत्तीर्ण 
हा नंदाचा आनंद!२

कधि बन्सीधर कधी चक्रधर
धर्मरक्षणा सदैव तत्पर 
तत्त्वाचा दे मकरंद!३ 

गोपांसंगे दहिदुधकाला 
समरसतेचा सुखद सोहळा 
देवकिनंदन गोविंद!४

कर्तव्याचे पालन करणे 
फलाशेत ना गुंतुन पडणे 
स्थितप्रज्ञ परमानंद!५ 

कधी सूक्ष्मसा कधी भव्यसा 
सोऽहं ऐसा धरा भरवसा 
इथे तिथे गोविंद!६ 

गीतादर्शन माधवदर्शन 
माधवदर्शन स्वरूपदर्शन 
नकळत गळला भवबंध!७

रचयिता : श्रीराम बाळकृष्ण आठवले 
२५.१२.२००८ गुरुवार