हवा प्रपंच ज्याला त्याला परि हवा देव कोणाला?

हवा प्रपंच ज्याला त्याला 
परि हवा देव कोणाला?ध्रु.
 
प्रपंच भासत खरा 
भुलवित परि तो नरा 
देवाविषयी का न भरवसा-? 

प्रश्न मला पडला!१ 

वृत्ति न स्थिर राहते 
भोवऱ्यापरि ती गरगरते - 
अधिष्ठान का ठाम न घेते?
जो तो भरकटला!२ 

मनुज बरा मध्यम 
साधना घडेल जर उत्तम 
याच नराचा हो नारायण -
अतर्क्य प्रभुलीला!२ 

रचयिता : श्रीराम बाळकृष्ण आठवले

गोंदवलेकर महाराज यांची प्रवचने मधील प्रवचन क्रमांक ६९ (९ मार्च) वर आधारित काव्य.

देवाचे अधिष्ठान ठेवून प्रपंच करावा असे कोणीच म्हणत नाही. सगळ्यांना प्रपंच हवा आणि देव 'असला तरी चालेल' म्हणजे प्रपंच तेवढा खरा असं ते मानून चालतात. देवाविषयी त्यांच्या मनात संशय असतो. मात्र वृत्ति कितीही अस्थिर असलेली त्यांना चालते. व्यवहारामध्ये आपण दुसऱ्याची लबाडी ओळखून वागावे एवढी लबाडी आपल्यामध्ये असावी. पण आपण स्वतः लबाडी करू नये. लोकांकडून न फसण्याइतकेच आपण व्यवहारी असावे. व्यवहाराच्या दृष्टीने बघितले तर मला मध्यम स्थितीतील माणसे जास्त भेटली. ती व्यवहाराला व संगतीला फार चांगली असतात कारण ती सर्व बाजूंनी मध्यम असतात.