भाग्य माझे, ज्ञानराजा, करित मम समजावणी!

भाग्य माझे, ज्ञानराजा,
करित मम समजावणी!ध्रु.

भोगले त्याने असे जे, वानण्याला शब्द नाही 
माय नसता, तात नसता, माउली होऊन राही 
चार भावंडेहि करती धर्मक्षेत्री लावणी!१ 

चालणे त्यांचेच यात्रा, बोलणे ही वेद ते 
जाणण्याचे जे स्वये ते ज्ञानियाला ज्ञात ते 
चरित सारे चित्रमय ते दंग होतो चित्रणी!२ 

काय वानू थोरवी हो मौन होते वैखरी
वदन माझे हेच वदते 'श्रीहरि जय श्रीहरि'
चार नक्षत्रे जणू की विष्णुमयशी दर्शनी!३ 

वाचनी ज्ञानेश्वरी जर भाग्य याहुनि कोणते? 
भाग्य छे सौभाग्य ते अबिर कुंकुम वाटते 
धन्य सारी तीर्थक्षेत्रे आपल्या घरि येउनी!४

रचयिता : श्रीराम बाळकृष्ण आठवले 
०३.१२.२००८ बुधवार