या शिवबानं, शिवबानं मावळ्यांस्नी येडं क्येलं
आम्हांस्नी येडं क्येलं! ध्रु.
शिवबा सांबाचा अवतार
करुणा करतो अपरंपार
भवानी आई प्रसन्न ह्याला गुपित आम्हां कळलं! १
आम्हां दोस्तांची सेना झाली
रामा वानरसेना मिळाली
राज्य अता देवाचं, राज्य अता रामाचं सपन सोनेरी पडलं! २
दिसारातीचं भान न्हाई
या शिवाची लइ पुण्याई
करू हेरगिरी, करू मुलुखगिरी दुजं न काही रुचलं! ३
याचं मधाळ रसाळ हसणं
याचं लाघवि आर्जवी बोलणं
या किस्नानं, या रामानं सहज आम्हाला भारलं! ४
लाल महालाशी संगत झाली
आईसाहेबांची माया जडली
या शिवबात, शिवबात शिवाचं दर्शन घडलं! ५
आता भितीचं नाव नाहि उरलं
आम्ही काळीज कापून दिधलं
या शिवबानं, शिवबानं प्रेमानं इकत घेतलं! ६
आता रामाचं राज्य येनार
आता धर्माचं राज्य येनार
बारा मावळातले, मावळातले मऱ्हाटी शिपाई सजलं! ७
रचयिता : श्रीराम बाळकृष्ण आठवले
No comments:
Post a Comment