तू पाठीशी असता रामा कशास करणे चिंता?

तू पाठीशी असता रामा
कशास करणे चिंता?ध्रु.

जे जे घडते हितार्थ असते
बाळ अडाणी माय जाणते
मोद उरे काळजी संपता!१

कर्तेपण जर तुला वाहिले
ओझे भारी सहजचि सरले
विनम्रता दे सीताकांता!२

स्वानंदामधि तुला स्मरावे
तुला स्मरावे निर्भय व्हावे
हे ही सगळे तूच वदविता!३

रचयिता : श्रीराम बाळकृष्ण आठवले

(गोंदवलेकर महाराज प्रवचन क्रमांक ३०१, २७ ऑक्टोबर वर आधारित काव्य)
परमेश्वराकडे कर्तेपण देऊन काळजी सोडून द्यावी. आपला देह प्रारब्धावर टाकून, साधकाने मजेत त्याच्या सुखदुःखाकडे पाहावे.