एकनाथ एक नाथ भागवती तेच ते!

एकनाथ एक नाथ भागवती तेच ते!
हरिचरणां स्मरुनि मना बिलग बिलग तेथे!ध्रु. 

भजने नर नारायण संत सांगतात
एक नाथ अंतरिचा जनी पाहतात
कृष्णरूप विश्व सर्व सज्जनास वाटते!१

कृष्ण कृष्ण आळवीत चिंतनी बुडावे
कार्य काय ध्येय काय आतुनि सुचावे
नाथ माय नाथ बाप भावभेट होते!२

जो पदार्थ क:पदार्थ सुख न त्यात काही
जो अनंत अंतरात त्यास तूच पाही
काम तुझा राम बनो श्याम येत तेथे!३

सद्गुण कर आत्मसात तूच देव होशी 

सोडुनि घर श्रीहरिला कुठे शोधतोसी?

तू प्रसन्न जग प्रसन्न हसत खेळ नेटे!४

रचयिता : श्रीराम बाळकृष्ण आठवले
०५.०५.१९८५