गीताप्रभात

 ऑडिओ - गीताप्रभात

सर्वकाळ मज आठव पार्थ 
तुझी लढाई तू लढणे 
प्रामाणिक जो निजहृदयाशी 
कधी न त्याला पडे उणे!१ 

कधी न त्याला पडे उणे 

मरणाला भ्यायचे कशाला? 
अरे जन्मला तो मेला 
का डरतोसी  आघातांना 
जो हसला तो वीर भला!२ 
जो हसला तो वीर भला 

मी अपुले कर्तव्य पाळले 
यामध्ये जो संतोष 
सांग अर्जुना सख्या मला तू 
अपयश का असतो तो दोष?३
अपयश का असतो दोष? 

हारजीत जो समान समजत 
तोल मनाचा सांभाळी 
खेद न त्याच्या चित्ता स्पर्शत 
त्याच्या वदनी दिपवाळी!४ 
त्याच्या वदनी दिपवाळी 

गीता घ्यावी जगावयाला 
हरिनामाचा कर गजर 
जीवनयोद्धा तूच पांडवा 
लढताना तू मला स्मर!५ 
लढताना तू मला स्मर 

रचयिता :  श्रीराम बाळकृष्ण आठवले
१३.०७.२००३