गीता संध्या

आहारावर पूर्ण नियंत्रण 
जीभ असावी ताब्यात 
विहारही मोजका असावा 
वीर न बुडतो विषयात
वीर न बुडतो विषयात!१ 

भलेबुरे ते आतुन कळते 
विवेक प्रामाणिक मित्र 
मने मनाला जोडत जावी 
संघटनेचा हा मंत्र 
संघटनेचा हा मंत्र!२ 

नकोच आसक्ती कसलीही 
देहाची वा स्वजनांची 
अप्रिय जरी कर्तव्य भासले 
सबब नको टाळायाची 
सबब नको टाळायाची!३ 

संध्यासमयी घ्या आढावा 
स्वभाव कैसा, कसा हवा
श्रीकृष्णाच्या नामस्मरणी 
उद्या उजाडो दिवस नवा 
उद्या उजाडो दिवस नवा!४ 

असो नसो मी काय तयाचे 
महत्त्व ना या गोष्टीला 
मी कर्ता हा गर्व ना शिवो 
श्रीहरि दे भक्ती अमला 
श्रीहरि दे भक्ती अमला!५ 

रचयिता : श्रीराम बाळकृष्ण आठवले
१३.०७.२००३