सुभाष विद्यामंदिर

सुभाष विद्यामंदिर माझी आवडती शाळा!

मुला मुलींना गुरूजनांना हिचा लागला लळा!ध्रु.

हिच्याच छायेमधे बैसुनी ज्ञानार्जन करता 
हिच्या अंगणी आनंद लाभे रमता बागडता
जीवन म्हणजे खेळ मजेचा धडा शिकवला मला!१

तन झिजवावे, मन घडवावे फुलते व्यक्तित्व 
परिश्रमाने यश लाभावे कळू दे अस्तित्व 
जनसत्तेचा शिक्षणकाली अर्थ इथे कळला!२
 
जवान कोणी, किसान कोणी, कोणी अधिकारी
ध्येय ध्रुवावर दृष्टी ठेवुन प्रगति करी भारी 
प्राण जोवरी तो न विसरणे शालामातेला!३

रचयिता : श्रीराम बाळकृष्ण आठवले
१३.०७.२००१
(या शाळेत जून १९५७ ते मे १९५९ नोकरी)