श्रीनवनाथा प्रसाद द्यावा

श्रीनवनाथा प्रसाद द्यावा द्यावा सहवास 
असे जाणवो जिवास तुमचा इथे तिथे वास!१ 

देहच मी या अज्ञानाने भित्रा मज केले
विषय सुखाला दुबळे मन हे व्यर्थ व्यर्थ भुलले!२

चुकले कोठे तुम्ही सुचविले तुमचा उपकार 
सद्गुरुनाथा स्वरूपनाथा तुम्हा नमस्कार!३ 

आसनावरी मजला बसवा हात शिरी ठेवा
मन पवनाला द्या द्या बांधुन माझ्या गुरुदेवा!४
 
बाहेरुन मज आत आणले दाखवता वाट 
जय जय जय जय श्रीनवनाथा स्वर देती साथ!५ 

गंध दरवळे असे जाणवे सोऽहं घमघमला 
मागुति पुढती इथे तिथे हे नवनाथा दिसला!६
 
वाचत जा तू नेमे प्रेमे रहस्य उलगडते
तव प्रश्नांना तुझी उत्तरे अनुभव घे येथे!७ 

नको मानवा उगाच पसरू मागण्यास हात
न मागता भगवंत देतसे घे घे ध्यानात!८

या साक्यांचे चिंतन कर रे कोण वदे कानी?
भक्तीचे फळ भक्तिच असते सांगतात ज्ञानी!९

रचयिता : श्रीराम बाळकृष्ण आठवले