मंगलमूर्ती मोरया

मंगलमूर्ती मोरया!ध्रु.

घवघवीत बघुनी मूर्ती 
कर अमुचे नकळत जुळती 
अभयदान द्यावे सदया! १

आनंद असतो हातात 
मोदक आणत ध्यानात 
भेदभाव जाई विलया! २ 

अंकुश ठेवा मनावर 
पाश फेकणे रिपूवर 
द्या शक्ती अरि मर्दाया! ३ 

आसन सुस्थिर झालेले 
निष्प्रभ ठरताती हल्ले 
आत्मश्रद्धा द्या हो द्या! ४ 

मस्तक ठेवी शांत सदा 
स्थितप्रज्ञ विजयीच सदा
शिकवा विद्या आचार्या! ५ 

रचयिता : श्रीराम बाळकृष्ण आठवले
११.११.२००३