एका जनार्दनी

एका जनार्दनी रंगे निरुपणी 
पाहे नित्य जनी जनार्दन १

संसारी असूनी विरागी नि ज्ञानी 
एक तत्त्व मनी सोपे नाम २

ग्रंथ भागवत जाणुनी भावार्थ 
शिरे आत आत शांतिब्रह्म ३ 

गिरिजा ही भार्या आत्मयास काया
जनी वावराया जोडपे ते  ४ 

हरि त्यांचा सुत वैदिक पंडित
कांचन हो तप्त अग्नीमुळे ५

दया क्षमा शांती एकाची विश्रांती
जाणे जनरीती एकनाथ ६ 

करी सोपे ज्ञान करी गोड गान
सोsहचे ते भान नित्य त्यास ७

चंदनाचा गंध ऐसा भावबंध
श्रीरामा आनंद अभ्यासात ८ 

दुःखातले सुख वियोगात योग
सत्य होती भोग हीच कृपा ९

रचयिता : श्रीराम बाळकृष्ण आठवले
३.२.१९९७