महाराष्ट्राची मंगलता..

महाराष्ट्राची मंगलता ती 
श्रीमंत दगडूशेठ हलवाई गणपती!ध्रु.

पुण्यात यावे, दर्शन घ्यावे 
ध्यान देखणे बघत राहावे
आनंदाश्रू ओसंडताती !१

अलंकार सजवती मूर्तिला
की मूर्ति सजविते अलंकृतीला
प्रश्न पडे भक्तांच्या पुढती ! २ 

सात्विक सुंदर गणेश प्रेमळ 
करतो अपुले तनमन निर्मळ 
रम्य स्मृति या वेधुन घेती !३

गणपति पुढती उभा ठाकला
निवांत निर्भय क्षणात झाला
नकळत अगणित कर जुळताती !४

शब्दाविण त्या कळले सारे 
तुझ्या आत मी वसे पहा रे
मिश्किल हासत वदे गणपती !५

सांगायाचे नुरले काही 
मागायाचे काही नाही 
सरल्या खंती, सरली भ्रांती !६

रचयिता : श्रीराम बाळकृष्ण आठवले
१५.९.२००४