तुजशी बोलावे, तुझे नाम घ्यावे

तुजशी बोलावे, तुझे नाम घ्यावे
गाता गाता नकळत माझे मीपण लोपावे!ध्रु.

असे ऐकले नामामागे
तुजला धावत यावे लागे
जीवन माझे तुझिया स्मरणे सार्थकि लागावे!१

वाचा लाभे नाम गावया
चित्त लाभले तुजसी ध्याया
अतूट नाते म्यां भक्ताने तुजसी जोडावे!२

बहिरंगा भुलतसे विकारी
अंतरंग पाही अधिकारी
आत्मारामा अंतरात मी तुजसी निरखावे!३

रचयिता : श्रीराम बाळकृष्ण आठवले
(गोंदवलेकर महाराज प्रवचन २५७, १३ सप्टेंबर वर आधारित काव्य)