आरती श्रीकृष्णाची

जय देव जय देव जय जय श्रीकृष्णा
आरति ओवाळिता  नयनी गंगायमुना!ध्रु. 

गोप नि गोपी आम्ही जन्मोजन्मीचे
आतुरलो श्रवणाला भगवद्गीतेचे
कर्मयोगाला कोठे ना तुलना!१ 

हे मुरलीधर गिरिधर गोंडस गोविंदा
पापवासनांचा कर चेंदामेंदा
आनंदकंदा श्रीनंदनंदना!२ 

हासत खेळत जगणे जीवन या नाव
अवखळ त्या मनाला अभ्यासा लाव
फुंकर घालुनि वाजव मुरली मोहना!३

थोरांमाजी थोर थोर सानांत सान
गवळी गोपगडी तू कृष्ण किसान
चराचरामध्ये तुझी चेतना!४ 

समाधान हाच योगांचा योग 
तोच घालवितो रोगांचा रोग 
धन्वंतरी रामा जगदीशा कृष्णा!५ 

रचयिता : श्रीराम बाळकृष्ण आठवले