दर्शनास आलो दत्ता

दर्शनास आलो दत्ता, इथे शांत वाटे
इथे शांत वाटे, दत्ता समाधान होते! ध्रु

"दत्त, दत्त," जप हा चाले
चित्त पदी सुस्थिर झाले
भावभरे भरतो ऊर कंठ मात्र दाटे!१

जटाजूट शोभे माथी
करी माळ आणिक पोथी
सुवेष हा अपुला दिसता जुळे गोड नाते!२

कमंडलूमधले नीर
अधीरास बनवी धीर
भलेबुरे सोसत जावे चक्र पाठ देते!३

कामक्रोध अंकित होता
नाग रुळे कंठी दत्ता
भस्म चर्चिता अंगाला पाप भस्म होते!४

शंखनाद सोऽहं गमतो
दीर्घकाळ साधक बसतो
मंत्रमुग्ध होण्यासाठी स्मरण साह्य देते!५

रचयिता :: श्रीराम बाळकृष्ण आठवले
२९.०१.१९८९
नारायण महाराज केडगाव यांच्या चरित्रावर आधारित काव्यातील हे एक काव्य