स्वरूपप्रभात

 

मना नाम घे तू मनाशी निवांत
पहा आत झाली स्वरूपप्रभात! ध्रु. 

गुरुमाउली ती कशी पाहते ते 
मने मूल झाला तया जाणवे ते
जरी शब्द ना सूर ते गीत गात!१

कसा मंद वारा कसे गोड ऊन 
विठाई कशी घे मुला सावरून 
अलंकापुरी नांदते पावसेत!२

कसे ध्यान लागे तुला काय चिंता
पहा सद्गुरू तो निवारी अहंता 
दुजाभाव ना तो असा भक्तिप्रांत!३

असा नेम तू नित्य लावून घ्यावा
प्रभाते मनी नाथ चिंतीत जावा
खरा मोद नांदे तुझ्या आत आत!४

जरी अज्ञ श्रीराम तो आर्त झाला
वदे साई स्वामी विसावा मिळाला
समाधीत लाभो तया साधुबोध!५

रचयिता : श्रीराम बाळकृष्ण आठवले